الرئيسية
السلام عليكم ورحمة الله وبركاته
حكاية مصطفي
مصطفي ده بقي كان ولد زي القمر
انتوا عارفين كان قريب مين؟
يا تري خمنتوا؟
انا مش حسيبكم تفكروا كتير
انتو فكرين موقف (يا وحشة)موجود على الرابط ده
https://future-youth.yoo7.com/montada-f5/topic-t45.htm
، أكيد طبعا انتوا عارفين الموقف
اهو مصطفي ده بقي يبقي أخو راندا اللي كانت بتزعقلي وبتقول لي : يا وحشة
شوفتوا بقي الدنيا ضايقة ازاي
ادينا رجعنا تاني لراندا ، بس المرة ديه بطل القصة هو مصطفي
مصطفي كان عنده خمس سنين ، وكان طفل رقيق وجميل وكله ذوق ، كان جنتل طفل بمعني الكلمة ، وأعتقد انه لما يكبر حيكون جنتل مان ان شاء الله
الدكتور كتب له في الروشتة حقن مضاد حيوي شديدة ، وطبعا الحقن ديه مؤلمة جدا ، وجاءت لي مامته علشان أصرف لها العلاج وطبعا يأخد الحقن
بس مستحيل ...... مصطفي صديقي الجميل الرقيق الشيك أخليه يكرهني ........مش ممكن ، مش ممكن ، أبداااااااااااا
مين اللي قامت بقي بدور الساحرة الشريرة ؟
ج :- إنها ندي المساعدة اللي كانت معايا في الصيدلية
مصطفي كان رافض إنه يأخد الحقن ، ووافق بس علشان بيحبني ، وكان لازم ادخل معاه وهو بيأخد الحقنة علشان يمسك فيا وأصبره ، وكان بيرفض ان مامته تدخل معاه ويقول لها : بلاش تيجي يا ماما خلاص
، دكتورة أمل معايا(أصله كان بيحبني قوي)
كان يا عيني يفضل ماسك فيا جامد قوي وهو بيأخد الحقنة ، ومايرضاش يعيط عشاني ، كان والله ما شاء الله بيستحمل أكتر من الكبير ، وده كله علشان ما يظهرش ادامي بمظهر الضعف
شوفتوا الرجولة المبكرة
( الله يحفظه يا رب)وبعد ما الحقنة تخلص ، آلامها بتفضل ذي ما هيه ، فكنت أقول له : الحقنة خلصت يا مصطفي ، ها ايه الأخبار؟
فكان مصطفي حبيبي يرفع وشه ليا ويبتسم علشان يطمني
وأنا ببقي عارفة كويس قوي أد ايه هو تعبان
يا رب يرزقني بعد الزواج ان شاء الله بولد زيه
قولوا آمين
