الرئيسية
[center]البرافو
اى التشجيع
اى التصفيق
اى الإعجاب
اي الكلمة اللي بترفع من الروح المعنوية
**
هو ده النهاردة موضوعنا فى الكلام
التشجيع واثره على حياتنا وادائنا وحالتنا النفسية
**
انك تقول لبنتك الصغنونة برافووووو وتصفق لها
لما تلاقيها وضبت سريرها من غير مساعدة حد
حتى ولو كان التوضيب مش اوي وكان نص نص
بس مجرد انها تلمح فى عيونك نظرة اعجاب بأدائها
وتلاقيك بتهلل بكلمة برافو
صدقنى هتلاقي بنوتك المرة الجاية
بتعمل كل مافي وسعها علشان سريرها يكون متوضب
احسن من المرة اللى فاتت
**
لما ابنك يحفظ سورة الفاتحة
ويجى يسمعهالك
ورغم انه اتلغبط فى تلات ارباعها ومع ذلك
انتى متعصبتيش عليه
ولا زعقتيله
بل بالعكس
بصيتى فى عيونه بكل حنان واعجاب
وقلتيله برافوووووو
انت شطور خالص
وصقفتيله وادتيله بومبوناية
صدقينى هتلاقى ابنك المرة الجاية
عايز يحفظ الفاتحة بشكل احسن
علشان يكسب رضاكى واعجابك بيه
**
انك تركز مع مميزات مراتك
ودايما تشيد بالحاجات الحلوة اللى بتعملهالك
وتتجاهل _عمدا _ عيوبها وغلطاتها
ده بيخليها تحس اد ايه انت بتحبها
وانك مصر انك ماتشوفش منها الا كل ماهو جميل
لكن لما دايما تنعتها بالصفات الوحشة والقبيحة
ودايما فى خلافاتكم تقولها الفاظ مش ولا بد
زى انها غبية ومش فاهمة حاجة
صدقنى انت كدة بتكسر حاجات كتير جواها
وبتخليها تحس من جواها ان عمرها ماهاتعرف ترضيك
وان عمرها ماهتكون فى نفس المستوى الفكري
اللي انت عايزها تكون عليه
انت كدة بتفقدها ثقتها بنفسها
وتخلق منها شخصية مهزوزة
بتخاف من اى تصرف ممكن تعمله لا تتهمها فيه انها غبية
والشعور ده لو كبر جواها
هتخليها بعد كدة بتتمنى انك لو مكونتش في حياتها
لان وجودك قدامها بيعزز شعورها بعدم ثقتها بنفسها
فارجوكم يا ازواج
رفقا بزوجاتكم
وامسكوا لسانكم وقت الغضب وبلاش كلمات الاحباط
**
فيه بعض الرجالة وجهة نظرهم انهم لما يحبطوا مراتتهم
هما كدة بيستفزوها علشان تعمل الاحسن
يعنى مثلا واحدة بتتعلم السواقة
جوزها بدل ما يقولها برافو وفيه تقدم
يقوم يقولها
مفيش فايدة فيكى مش هاتتعلمى السواقة ابدا
هو هنا نيته بتكون سليمة
هو فاكر ان الكلمتين دول
هايستفزوها علشان تثبتله انها زكية
وانها هاتتعلم السواقة بسرعة
واللى ما يعرفهوش الراجل
ان احنا بنحبط جدا من الكلمات دى وبنرتبك
وبتاثر فينا بالسلب
وتسد نفسنا عن اللى احنا بنعمله
لكن لو شجعتونا هتلاقونا بنعمل العجب
**
والزوجة كمان عليها عامل كبير فى نجاح جوزها
لما جوزها يرجع من شغله ويحكيلها على قرار خده فى الشغل
حتى ولو انتى مش مهتمة بشغله وشايفاه ممل
برضه كلمة التشجيع هنا مهمة اوى
انك تقوليله والله برافو عليك
انت طول عمرك دماغك نضيفة
وهتعرف تمشى الشغل كويس
وتحاولى تندمجى فى كلامه
ودايما نظرات عيونك تكون مليانة اعجاب بجوزك وقراراته
صدقينى هو بيفرح اوى بالحاجات الصغنونة دى
وبتخليه يركز فى شغله اكتر ويحاول دايما يعمل الاحسن
**
طبعا المواقف الحياتية
اللى بتتطلب كلمة تشجيع كتيرة ومتنوعة ومختلفة
وانا هنا مش ناوية احصر كل المواقف
انا بس عايزة اقول لكل اب وام شجعوا ولادكم
بصوا دايما لاى حاجة حلوة بيعملوها
حتى ولو كانت بسيطة
وعززوها بكلمات التشجيع
هتلاقوا ولادكم اكثر هدووءا نفسيا
هتلاقيهم بيحبوا اللي بيعملوه
هتلاقوهم بيتفننوا انهم يرضوكم
الاطفال بيعشقوا لحظات الرضا اللى بنمنحهالهم
فبلاش نحرمهم من اللحظات دى
ونحاول على اد ما نقدر
اننا نتلكك على اى حاجة حلوة بيعملوها
ونقولهم برافوووووو
**
و عايزة اقول لكل زوج وزوجة
لو الطرف التانى اتصرف مرة بغباء من وجهة نظركم
ياريت قبل ما تتفوهوا باى كلمة مهينة او محبطة
افتكروا ان كلمات الاحباط
هتسد نفسه اكتر
وهتخليه يحس بعدم ثقة فى تصرفاته
ومش بعيد يجى يوم هتلاقوا ان الطرف التانى
اللى اتشبع من كلمات احباطكم
نفسه بقت مسدودة منكم انتوا كمان
فبلاش كلمات الاحباط
واستبدلوها بكلمات التشجيع حتى ولو كانت زائفة
**
طبعا مش محتاجة اقول للمدراء
ان كلمات التشجيع منكم للعاملين تحت ايديكم
بترفع من الروح المعنوية للموظف او العامل
وبتخلى الانتاج يزيد
وبتخلى الموظفين يحبوا شغلهم ويخلصوا فيه
[CENTER]وطبعا نفس الحكايه للمدرسين
**
الاحباط والتقليل من الشأن
بيخلقوا شخصية مهزوزة مهملة فاقدة الثقة بنفسها
لكن التشجيع بيصنع المعجزات
وبيخلي الإنسان يعطي افضل واحسن ماعنده
لذلك انصحكم بالإكثار من الــ bravooooo
