الرئيسية
المدمن
ايه اللي حصل بقي؟؟؟؟؟؟
اول ما اتخرجت اشتغلت صيدلي تاني في صيدلية كان فيه واحد شكله غريب قوي كان بييجي للدكتور اللي كان معايا وكان يطلب منه حاجة أنا مش سامعاها ، وساعات الدكتور كان يقول له :لأ ، وساعات كان بيديله حاجة(؟؟؟؟)
المهم : مرة كنت لوحدي في الصيدلية ، في فصل الصيف الساعة 3 الظهر ، يعني الدنيا حر لدرجة إن مفيش حد ماشي في الشارع تقريبا
وأنا موجودة داخل الصيدلية ومشغلة التكييف وقفلت الباب ، وباعمل جرد للصيدلية
دخل عليا الراجل اللي شكله غريب ده
وطلب مني شريط(.......) هو صنف عادي مش جدولفبصيت ليه بشك كده ورحت جيبته ليه واديتهوله
لقيته بص علي الشريط بفرحة شديدة ، وبدأ يبصلي نظرات عجيبة
فاستغربت منه جدا
وبعدين طلب قرص أوبلونج وبربع جنيه أسبرين
اديته اللي عاوزه ، وتمنيت إنه يمشي بقي
لقيته بيقول لي : هو أنا لو أخدت الخمس أقراص ريفو دول مع بعض يحصل حاجة؟
قلت له: طبعا ممكن تموت
قال لي ماشي
وفضل واقف يتفرج علي التليفزيون اللي كان شغال ومش عاوز يمشي
فمسكت الريموت وقفلت التليفزيون
فبدل ما يبص للتليفزيون بدأ يبص علي الدهب اللي في إيدي
وأنا كنت يومها بالذات لابسة اسورة دهب شغلها يغر كده
فقلت له: في ايه؟، انت مش أخدت الدوا ، يلا اتفضل
بص لي وهو يبتسم ابتسامة عجيبة
وقال: ماشيوبدأ يمسك شريط(......) ويفك كل الأقراص بتاعته في ايد ، وكمان فك الريفو والأوبلونج وبدأ ياخدهم في فمه
فقلت له: ماتخدش الدوا هنا ، روح خده بره ، اتفضل امشي
برده يبص لي بابتسامة عجيبة
ويقول : ماشيوفين وفين بدأ يخرج من الصيدلية
أنا كنت خايفة جداً ، وخاصة إني كنت لوحدي
وفين؟ في صيدلية ، يعني مكان مغري لأي مدمن إنه يسرقه ، طبعا كله أدوية جدول وغير الجدول ووفلوس
ويا ريته حيكتفي بالسرقة بس ، الله أعلم كان ممكن يقتلني ولا حاجة
فطلعت علي باب الصيدلية أتأكد إنه مشي ، وتمنيت إن الدكتور زميلي في الصيدلية يوصل دلوقتي
وفعلا سبحان الله لقيته بيركن العربية بتاعته
أنا اتردت لي روحي
وكانت أكتر مرة أفرح إن الدكتور زميلي جاء في ميعاده
الحمد لله إنها عدت علي خير
بعد كده الراجل ده كان بيجي ليا في الصيدلية يطلب الدوا ، لكن كنت بقول له : الدوا خلصان
وطبعا كان بيبقي معايا حد في الصيدلية
أصل أنا حرَّمت أقف لوحدي في الصيدلية
