الرئيسية
مش عاوزة مش عاوزة
عنوان موقف النهاردة غريب شوية
مش كده
يا تري ايه هو اللي مش عاوزاه مش عاوزاه
أنا سأحكي لكم الحكاية
أنا كنت في الصيدلية، ومعايا د/أمجد، وكمان فتحي (صاحب موقف بالشفا يا عم الحج) كان موجود
دخلت علينا بنت صغيرة ، معاها جنيه ، وقالت : أنا عاوزة واحد بامبرز.
قلت لها : ماشي يا حبيبتي
ورحت جبت البامبرز ، وقربت منها علشان اديه لها
لقيتها بتقولي وهي بتشاور بايدها الصغيرة : مش عاوزة مش
عاوزة
فاستغربت جدا عليها وقلت لها: انت مش طلبتي بامبرز
قالت لي : لأ ، أنا عاوزة اربع أقراص كيتوفان
" اللهم طولك يا روح "
صبَّرت نفسي وقلت : ماشي
ومسكت المقص ، وقصيت اربع اقراص كيتوفان ، وقلت ليها : خدي يا حبيبتي
لقيتها بتقول لي وهي بتشاور بايدها الصغيرة : مش عاوزة مش عاوزة
بدأت أتنرفز
، وقلت لها : تاني ، انت مش طلبتي اربع اقراص كيتوفانقالت : لأ ، أنا عاوزة بامبرز.
كان رد فعلي عليها إني فتحت درج الفلوس وأخدت الجنيه اللي كانت دفعاه ، ورجعته ليها وقلت لها : روحي اشتري من صيدلية تانية
( يعني يا رب انا أساسا بكره اتعامل في أي شئ في الصيدلية غير الدواء ، تقوم تجيلي البنت ديه علشان تغيظني)
فالبنت قالت: لأ خلاص خلاص معلش ، أنا عاوزة بامبرز
راح د/أمجد قال لها : يلا يا حبيبتي ، روحي جيبي من صيدلية تانية
فالبنت عيطت
وقالت: معلش معلش ، خلاص ، أنا عاوزة واحد بامبرزاحنا الاثنين ماردناش عليها وسيبناها تعيط
طلع بقي أ/فتحي من المعمل ذي الغضنفر بالظبط ، وقال للبنت : انت عاوزة ايه؟
أنا و د/ أمجد سكتنا وقلنا يمكن فتحي يعرف يتعامل معاها
المهم البنت قالت له: أنا عاوزة واحد بامبرز
دخل فتحي وجاب ليها واحد بامبرز ، ومد ايده ليها بالبامبرز
لقاها بتقول له وهي بتشاور بايدها الصغيرة : مش عاوزة مش عاوزة
احنا قعدنا نضحك
أما فتحي فطلع يجري وراها
هــههههههههه
معلش
يا جماعة ، ديه أول مرة أضحك علي موقف قبل ما أعرف تعليقكم ، لكن كل ما
افتكر منظر أ/فتحي وهو خارج من المعمل وبيسأل البنت هي عاوزة ايه ، كأنه
حيجيب الديب من ديله مابقدرش امسك نفسي عن الضحك
أتمني يكون الموقف عجبكم
