السلام عليكم ورحمة الله وبركاته
موضوع اليوم عنوانه (حقنة اوتومبيل)
فيه جاره للصيدلية اسمها ام اسلام
هي ست غلبانة بتقف تبيع سندويتشات علي عربية كبدة
وطبعا كل لوازمها الطبية بتشتريها من الصيدلية بتاعتنا
دخلت عليا الست ام اسلام وكانت يا عيني تعبانة ، وقالت لي:
يا ست الدكتورة أنا عاوزة مُضِد حَلَوِي عشان الواد ابن بنتي
فضحكت طبعا، وقلت لها: اسمه مضاد حيوي يا ام اسلام
قالت لي : ما أنا عارفة يا ست الدكتورة ، اسمه مُضِد حَلَوِي
قلت لها : ماشي يا أم إسلام ، أنا حديلك ان شاء الله مُضِد حَلَوِي كويس قوي
وفعلا صرفته ليها ومشيت
لقيتها بعد كده دخلت عليا وبتقولي: يا ست الدكتورة ، أنا ركبي وجعاني قوي آخد لها ايه ، بيقولولي آخد حقنة أوتومبيل
قلت لها : يا خبر ، اوتومبيل مرة واحدة ، طب يا أم اسلام ابقي جبيلي واحد معاكي عشان نفسي اشتري عربية صغيرة كده
إنت قصدك يا ام اسلام حقنة تراي بي
قالت لي : أيوااااااااااااااه ،هي ديه ، حقنة أوتومبيل
شوفتوا بقي يا جماعة ، إحنا لازم نحزر ونفزر علشان نوصل مع المريض للي عاوزه اذاي
إيه رأيكم في اللي إحنا فيه بقي؟