(بالشفا يا عم الحج)
السلام عليكم ورحمة الله وبركاته
بصوا بقي يا جماعة، انا النهاردة مش حاحكي موضوع حصل ليا لكن حاحكي موضوع حصل لفتحي المساعد اللي موجود معايا في الصيدلية
اولا هو شكله يدي علي دكتور، وحتي يا عيني عليا الناس بيفتكروه احيانا ان هو الدكتور وانا يا إما دكتورة تحت التمرين أو إني أكون المساعدة بتاعته( رغم يا جماعة إن أنا والله مالية مركزي ولبسي شيك وكمان لابسة نظارة ومعلوماتي العلمية كويس قوي )
بس كل ده ساعات ما بيعملش حاجة مع الناس اللي بيدخلوا الصيدلية هي ديه الثقافة اللي موجودة بين الناس
المهم
فتحي بيحكيلي عن موقف حصله في صيدلية البلد بتاعته ايام ما كان شغال فيها
كانت اول مرة يضرب حقنة ، ودخله راجل عجوز عاوز ياخد حقنه، فقال أما يجرب عليه
وكانت الحقنة الدواء بتاعها زيت، وطبعا لازم يحقن ببطء
البيه طبعا كان مايعرفش، فراح مدخل السن بتاع الحقنة وبعدين راح متعافي علي السرنجة راحت مفرقعة في وشه وانفصلت عن السن
وطبعا كانت مفاجأة قوية ليه ، السرنجة في يده ، والسن مغروز في عضل الراجل،.... يعمل ايه؟.....
بكل سهولة ، راح شايل السن من عضلة الراجل وراح قايل له : بالشفا يا عم الحج.
طبعا الراجل يا عيني ماصدقش نفسه وقعد يقول له: ربنا يخليك يا بني ، دا أنا ماحستش بيها خالص ،انت ايدك خفيفة خالص ، يا ريت كل الدكاترة يبقوا زيك.
ايه رأيكم بقي؟