الكمامة
هو عنوان موقف النهاردة
طبعا يا جماعة احنا كصيادلة وكذلك كل من له علاقة بالطب لابد أن يكون قدوة لغيره في لبس الكمامة
وأنا بحاول اطبق ده ، والفكرة فعلا مهمة جدا لينا مش علشان انفلونزا الخنازير بس ، لكن كمان علشان احنا بنتكلم ونتعامل مع مرضي ممكن يكونوا مصابين بانفلونزا أو نزلة معوية أو التهاب شعبي أو أو .......
المهم
لبست الكمامة
ولكن.....
وآه مما يأتي وراء كلمة لكن
حصل مواقف عجيبة خلال ساعة واحدة فقط
1- دخلت عليا واحدة شايلة ابنها ، راحت بصة ليا باستعجاب واشمئزاز وقالت : هو فيه ايه ، هو المرض انتشر خلاص
بصراحة أنا تضايقت منها ، وقلت لها : ايوه انتشر طبعا .
2- دخلت واحدة تانية ، وظلت مبتسمة بسخرية ،فتجاهلت تماما نظرات السخرية منها ، وتعجبت، وبعد صرف العلاج لقيتها بتقولي : انت لابسة ديه ليه؟ (قالتها وهي بتشاور علي الكمامة)
قلتلها: وانت مش عارفة أنا لابساها ليه
قالت لي : أيوه بس انت تعتقدي انها تعمل حاجة
قلت لها : أكيد طبعا،بتحمي النفس الي حد كبير
3- بعدها دخل راجل في الخمسينات ......
دخل من هنا وقعد يضحك عليا من هنا ويكركر ، وأنا أبص ليه وأقوله : بتضحك علي ايه؟
قعد يضحك ويضحك وفين وفين راح قايل لي : بضحك علي البتاعة اللي انت لابساها
4- دخلت عليا ست محترمة كده ومؤدبة......
ديه بقي لا علقت ولا ضحكت ، ديه بصت علي شكل الكمامة وتاهت وسرحت ، ونسيت هي كانت جايه ليه
حد يقولي اعمل ايه بس؟
انا تعبت نفسيا